मितिः २०८१, १० जेष्ठ बिहीबार

जिउँदो शिशुलाई मृत घोषित गर्ने चिकित्सकलाई काम गर्न रोक

विराटनगरको कोसी अस्पतालमा उपचारार्थ भर्ना गरिएकी १८ दिने शिशुलाई मृत घोषित गर्ने चिकित्सकसहित तीन स्वास्थ्यकर्मीलाई काम गर्न रोक लगाइएको छ । हाइपोथर्मिया भएकी शिशुलाई मृत घोषित गरी घर पठाउने अस्पतालका मेडिकल अफिसर आकाश यादवसहित तीन स्वास्थ्यकर्मीलाई काममा रोक लगाइएको हो ।
चिकित्सक यादवसहित अहेब लक्ष्मण माझी र टीका अधिकारीलाई काममा रोक लगाइएको अस्पतालले जनाएको छ । उक्त घटनाको छानबिन गर्न आज बिहीबार अस्पतालका बालरोग विशेषज्ञ डा. प्रवीण झाको नेतृत्वमा तीन सदस्य समिति समेत गठन गरिएको छ । अस्पतालका सूचना अधिकारी रामप्रसाद नेपालले तीनैजनालाई स्पष्टीकरण पनि सोधिएको बताउनुभएको छ ।
बुधवार बिहान ८ देखि दिउँसो २ बजेसम्म डा. यादव र अहेबहरू शिशुको उपचारमा खटिएका थिए । मोरङको जहदा गाउँपालिका–३ का दिलीप मुखिया र उहाँकी श्रीमती उमा मुखियाले शिशुलाई श्वासप्रश्वासमा समस्या भएपछि उपचार गर्न ल्याउनुभएको थियो । तर, चिकित्सक यादवले शिशुको उपचार नगरी मृत घोषणा गरी फिर्ता पठाइदिएपछि शिशुलाई घर लगिएको थियो । अन्त्येष्टिको तयारी हुँदै गर्दा शिशुले शरीर चलाएपछि आफन्तले गोल्डेन अस्पताल विराटनगर भर्ना गरेका थिए । अहिले शिशुको गोल्डेन अस्पतालमा उपचार भइरहेको छ । मृत घोषणा गरिएको शिशु जीवितै पाइएपछि कोसी अस्पतालका चिकित्सक यादवमाथि कुटपिट समेत गरिएको थियो ।

No widgets found. Go to Widget page and add the widget in Offcanvas Sidebar Widget Area.