मितिः २०८१, ५ असार मंगलवार

स्पोर्टस अवार्डको १९औं संस्करण अब आउँदो फागुन २३मा हुने

नेपाल खेलकुद पत्रकार मञ्च (एनएसजेएफ)ले हरेक वर्ष गर्ने स्पोर्टस अवार्डको १९औं संस्करण अब आउँदो फागुन २३ गते हुने भएको छ ।
वर्ष २०७८ मा नेपाली खेलकुदमा भएको प्रदर्शनका आधारमा खेलाडी र खेलकर्मीलाई अवार्ड प्रदान गरिने आज सोमबार आयोजित पत्रकार सम्मेलनमा जानकारी दिइएको छ । विगतका वर्षमा जस्तै यसवर्ष पनि स्पोर्टस अवार्डमा नौ प्रमुख विधा समावेश रहेका छन् ।
वर्षको उत्कृष्ट पुरुष र महिला खेलाडी, उत्कृष्ट युवा खेलाडी, उत्कृष्ट प्रशिक्षक, पिपुल्स च्वाइस अवार्ड, उत्कृष्ट पाराएथ्लिट अवार्ड, स्पेशल अवार्ड र लाइफटाइम अचिभमेन्ट अवार्ड प्रदान गरिनेछ । त्यस्तै एसियन जर्नलिष्ट अवार्डको नाममा एकजना एशियाली खेलकुद पत्रकारलाई सम्मानित गरिनेछ ।
वर्षको उत्कृष्ट पुरुष, महिला खेलाडी र प्रशिक्षक तथा पिपुल्स च्वाइस अवार्डका विजेताले पल्सर मोटरसाइकल पाउनेछन् । यस संस्करणदेखि वर्षका उत्कृष्ट युवा खेलाडीलाई मोटरसाइकल पुरस्कार दिइने एनएसजेएफले जनाएको छ । अन्य विधाका विजेताले नगद ५० हजार रुपैयाँ पाउनेछन् ।
एनएसजेएफले स्पोर्टस अवार्डको मुख्य प्रायोजकका रुपमा हंसराज हुलास चन्द एण्ड कम्पनीसँग आज नै सम्झौता गरिसकेको छ । यसअघिका १३ संस्करणमा मुख्य प्रायोजन गरेको हुलासले एनएसजेएफसँगको सहकार्य पाँच वर्ष लम्ब्याएको हो । योसँगै कार्यक्रमको नाम एनएसजेएफ पल्सर स्पोर्टस अवार्ड रहनेछ ।
नयाँ सम्झौताअनुसार हुलासले एनएसजेएफको अवार्डका लागि पहिलो वर्ष १२ लाख १० हजार नगद र पाँचवटा बजाज पल्सर मोटरसाइकल उपलब्ध गराउनेछ । नगद प्रायोजनमा हरेक वर्ष १० प्रतिशतका दरले थपिँदै जानेछ ।
एनएसजेएफले हुलाससँग तीन, पाँच र पाँच वर्ष गरी १३ वर्षसम्म सहकार्य गरिसकेको छ । हुलासका प्रवन्ध निर्देशक अभिमन्यु गोल्छाले युवा र खेलकुदसँग सहकार्य गर्ने कम्पनीको नीतिअनुसार स्पोर्टस अवार्डसँग लामो सहकार्य सम्भव भएकोमा गर्व लागेको बताउनुभएको छ । अभिमन्यु र एनएसजेएफका अध्यक्ष दुर्गानाथ सुवेदीले नयाँ सम्झौतामा हस्ताक्षर गर्नुभएको छ ।

No widgets found. Go to Widget page and add the widget in Offcanvas Sidebar Widget Area.