मितिः २०८१, १ असार शुक्रबार

नारायणी नदी किनारमा जारी कोटिहोम महायज्ञमा भक्तजनको भीड

नारायणी नदी किनारमा जारी साङ्ग–बिराट्–श्रीगायत्री कोटिहोम ज्ञानमहायज्ञमा हिजो सोमबार भक्तजनको सर्वाधिक सहभागीता देखिएको छ । हिजो सोमबार सार्वजनिक बिदा र नारायणगढ बजार समेत बन्द रहेकाले महायज्ञमा भक्तजनको भीड अहिलेसम्मकै धेरै भएको हो । महायज्ञ आज २०औँ दिनमा आइपुगेको छ ।
महायज्ञमा हिजो सांसद एवम् नेपाली कांग्रेसका केन्द्रीय सदस्य शंकर भण्डारीको प्रमुख आतिथ्यता रहेको थियो । पूर्व मन्त्रीसमेत रहनुभएका भण्डारी कांग्रेसभित्र हिन्दु धर्मको संरक्षण र नेपाललाई हिन्दु राष्ट्र बनाउनुपर्छ भन्ने पक्षका नेता हुनुहुन्छ । उहाँले नदी किनारमा भएको धार्मिक अनुष्ठानले सनातन धर्म संस्कृतिको रक्षामा टेवा पुग्ने विश्वास व्यक्त गर्नुभयो ।
त्यस्तै, महायज्ञको अवलोकन तथा दर्शन गर्न योगी पिताम्बर र आमन्त्रित कथावाचक बुद्धिसाग भण्डारीको पनि उपस्थित रहेको थियो ।महायज्ञमा शनिबारदेखि शिव महापुराण आरम्भ भएको छ । श्रीमद्भागवत महापुराण समापन भइसकेको छ भने श्रीमद्देवी भागवत महापुराण हुन बाँकी छ ।

महायज्ञमा जम्मा तीन वटा पुराण वाचन हुने महायज्ञका प्रमुख कथावाचक परशुराम पाण्डेयले जानकारी दिनुभयो । महायज्ञ अन्तिम चरणतर्फ लाग्दै गर्दा भक्तजनको सहभागीता बढ्दै गएको छ । श्रीसनातन संस्कृति संरक्षण अभियान र श्रीगण्डकी–नारायणी संरक्षण महाआरती परिषद्को संयुक्त आयोजनामा भएको महायज्ञ फागुन १२ गते सम्पन्न हुँदै छ ।

No widgets found. Go to Widget page and add the widget in Offcanvas Sidebar Widget Area.