एक महिनामा मलेसिया जाने नेपालीको संख्या २० हजारभन्दा धेरै

यो एक महिनामा वैदेशिक रोजगारको शिलशिलामा मलेसिया पुग्ने नेपाली कामदारको संख्या २० हजार भन्दा धेरै रहेको पाइएको छ ।
गत पुष महिनामा मलेसिया पुग्ने कामदारको संख्या २० हजार भन्दा धेरै रहेको वैदेशिक रोजगार विभागले जनाएको छ । विभागका अनुसार पुनः श्रम स्वीकृति र नयाँ श्रम स्वीकृति गरी पुस महिनामा सबैभन्दा धेरै मलेसियाका लागि श्रम स्वीकृति जारी भएको छ । मलेसियाका लागि २० हजार तीनसय ३९ श्रम स्वीकृति जारी भएकोमा १६ हजार सातसय ७५ त नयाँ अर्थात् पहिलो पटक श्रम स्वीकृति लिनेको सङ्ख्या रहेको छ ।
मलेसियापछि कतार जाने नेपालीको सङ्ख्या धेरै छ । विभागका अनुसार पुस महिनामा मात्रै कतारका लागि १३ हजार ६६ जनाले श्रम स्वीकृति लिएका छन् । यस्तै साउदीका लागि ११ हजार छ सय २७ जनाले, यूएईका लागि नौहजार २७ जनाले र कुवेतका लागि तीनहजार आठसय ८९ जनाले श्रम स्वीकृति लिएका छन् ।
गत पुस महिनामा मात्रै ६५ हजारभन्दा धेरै नेपालीले रोजगारीका लागि विदेश जान श्रम स्वीकृति लिएका छन् । विभागको तथ्याङ्क अनुसार गत पुस महिनामा नयाँ र व्यक्तिगत गरी ६५ हजार चारसय ६४ जनाले श्रम स्वीकृति लिएका हुन् । नयाँ श्रम स्वीकृति लिनेको संख्या मात्रै ३८ हजार आठसय ६४ रहेको छ । संस्थागत र व्यक्तिगत तवरबाट पुस महिनामा एकसय २० देशका लागि श्रम स्वीकृति जारी भएको विभागले जनाएको छ ।