जापानमा पानीजहाज दुर्घटना ः मृत्यु हुनेको संख्या आठ पुग्यो

जापानको तटमा पानीजहाज दुर्घटनामा मृत्यु हुनेको संख्या आठ पुगेको छ । दुर्घटनामा छ चिनियाँ नागरिकसहित आठ जनाको मृत्यु भएको चिनियाँ सञ्चारमाध्यमले जनाएका छन् ।जिन टियानले मङ्गलबार साँझ सुदूर दक्षिणपश्चिम जापानको दुर्गम र बसोबास नभएको डान्जो टापुहरूबाट करिब एकसय १० किलोमिटर पश्चिममा रहेको स्थानबाट सङ्कटको सङ्केत पठाएको थियो ।
जापानको कोस्ट गार्ड र सेनाका धेरै जहाज र विमानहरू साथै दक्षिण कोरियाली तटरक्षक र निजी जहाजहरू खोजी अभियानमा संलग्न रहेका र चालकदलका सदस्यहरुसहित १३ जनालाई पानीबाट बाहिर निकालिएको थियो । फेला परेका १३ जनामध्ये आठ जनाको मृत्यु भएको पुष्टि भएको र तीमध्ये छ जना चिनियाँ रहेको बताइएको छ ।