यो एक वर्षको अवधिमा त्रिभुवन अन्तर्राष्ट्रिय विमानस्थलबाट करिब ३५ लाख अन्तर्राष्ट्रिय हवाई यात्रुले यात्रा गरेका छन् । नेपाल नागरिक उड्डयन प्राधिकरणको तथ्यांक अनुसार सन् २०२२ मा त्रिभुवन विमानस्थलबाट मात्र ३४ लाख ८८ हजार तीनसय२८ जना यात्रुले अन्तर्राष्ट्रिय यात्रा गरेका छन् । यसमा आगमन र प्रस्थान दुवैको तथ्यांक जोडिएको छ ।
कार्यालयका अनुसार यो संख्या सन् २०२१ को तुलनामा साढे दुई गुणा बढी हो । सन् २०२१ मा अन्तर्राष्ट्रिय उडानका यात्रु संख्या १४ लाख ५६ हजार नौसय २९ जना रहेको थियो ।
सन् २०२२ मा त्रिभुवन विमानस्थलमा १५ लाख ५६ हजार आठसय ११ जना यात्रुको आगमन भएको तथ्यांकले देखाएको छ । यो नेपाली नागरिक र पर्यटकको संयुक्त संख्या हो । उक्त विमानस्थलबाट एक वर्षको अवधिमा १९ लाख ३१ हजार पाँचसय १७ जना यात्रु प्रस्थान गरेका छन् । यसरी विमानस्थलले एक वर्षको अवधिमा ३४ लाख ८८ हजार तीनसय२८ जना अन्तर्राष्ट्रिय यात्रुलाई सेवा दिएको हो ।
विमानस्थलमा एक वर्षको अवधिमा २४ हजार तीनसय १२ वटा उडान–अवतरण भएका छन् । जसमा १२ हजार एकसय ५८ पटक जहाजहरु त्रिभुवन अन्तर्राष्ट्रिय विमानस्थलमा अवतरण गरेका छन् । १२ हजार एकसय ५४ पटक जहाजहरु उक्त विमानथलबाट उडेका छन् ।
त्यस्तै। यो एक वर्षमा त्रिभुवन विमानस्थलबाट वायुयानहरुले दुईकरोड ६६ लाख ७६ हजार सातसय ८० किलो कार्गो ओसारेका छन् । जसमध्ये एककरोड ३२ लाख चार हजार सातसय ७० किलो सामान नेपाल भित्रिएको छ । एककरोड ३४ लाख ७२ हजार १० किलो सामान बाहिरिएको प्राधिकरणले जनाएको छ ।
सन् २०२१ को तुलनामा उडान संख्या, यात्रु संख्या उल्लेख्य बढेको छ भने कार्गो यस वर्ष घटेको छ । यसो हुनुको मुख्य कारण अघिल्लो वर्ष कोरोनाका कारण सीमा नाका बन्द हुनु र कार्गो उडानमा हवाईमार्गको प्रयोग हुनु हो सन् २०२१ मा अन्तर्राष्ट्रियतर्फ त्रिभुवन विमानस्थलमा पाँचहजार आठसय ८२ पटक जहाजको आगमन भएको थियो भने पाँचहजार आठसय ७८ पटक जहाजको प्रस्थान भएको थियो ।
यसरी एक वर्षमा ११ हजार सात सय ६० उडान÷अवतरण भएका थिए । सो वर्ष यस विमानस्थलबाट दुई करोड ९५ लाख १४ हजार एकसय २० किलो कार्गो ओसार–पसार भएको थियो । यस वर्ष एककरोड ५७ लाख २३ हजार एकसय ९५ किलो सामान भित्रिएको थियो भने एककरोड ३७ लाख ९० हजार नौसय २५ किलो सामान जहाजबाट बाहिरिएको थियो ।
मितिः २०८१, १२ माघ शनिबार
Menu